गजल

हिजोको झैँ आज  नेता मान्ने दिन गैसकेछ

नेता गाला जनताले  हान्ने दिन भैसकेछ,

खबरदार ! नेताहरु तिम्रो बाटो तिमी जान

नजानेमा घरमै आई तान्न दिन आईसकेछ,

जाबो एउटा किताब कोर्न यती दिन लाउँदो रै'छौ

तिमीले सम्बिधान कोर्न जान्ने दिन  गैसकेछ,

देश भन्दा पार्टी अनि पार्टी भन्दा आफै ठुलो

नेता जीले अब त्यस्तो ठान्ने दिन गैसकेछ

कुम्ल्याउँ भन्थ्यौ राष्ट्र लुटी आफु मोटोघाटो बन्दै

हरिया नोठ पत्रिकाले बान्ने दिन गैसकेछ ।।।

(आजको ताजा खबरमा आधारित – गल्ती छुट्याउने जिम्मा स्रष्टाहरूमा सुम्पिएँ ।)

२०६७-१०-०६,०२:०० बजे

गजल

कसलाई भनुँ मैले ? मेरै घरमा पानी छैन

खोला कुवा जाउँ भने शहरमा बानी छैन

रात दिन खटिएर मुहानदेखि धारासम्म

थोरै पानी थपुँ भन्छु थप्ने कुनै खानी छैन

आफ्नै घरमा नभए'सी अरूले के पाउलान त

ट्युबवेलको पानी पिउँदा भन्दिन त्यो हानी छैन

मैले बोल्या कस्ले यहाँ सुन्छ ध्यान दिईकन

मन्त्री ज्यूलाई भन्नुहुन्थ्यो मेरो चिनाजानी छैन ।।

२०६७-१०-०६,००:५८ बजे

गजल

मन यसै च्यातिया'थ्यो के थियो र सिउनलाई

बोतल नै सक्दा पनि पुगेन नि पिउनलाई

मस्त मस्त हावा थियो साथ दिने जाडो थियो

पिउनु थियो जिउनु थियो के थियो र लिउनुलाई

बहाना के चाहिया'थ्यो र ! मदमत्त बेला थियो

खोतले रै बाँची हेरेँ पुगेन नि जिउनलाई ।।।

२०६७-१०-०६,००:१६

गजल

पानी पर्दा सँगै हिड्दा छाता नभए हुन्थ्यो

उधारो खाई तिर्नु पर्ने खाता नभए हुन्थ्यो

जिन्दगीमा चाहे जति हिड्ने रहर गर्दा

नापिएर हिड्नुपर्ने हाता नभए हुन्थ्यो

दु:ख लेख्या जिन्दगीका पाना फाल्नु पर्दा

बचाएर राखिदिने गाता नभए हुन्थ्यो

मन पराउने सबै छोडी तिमीलाई भर पर्दा

झुक्याएर बाँच्नुपर्ने नाता नभए हुन्थ्यो ।।

२०६७-१०-०५,२३:१५ बजे